Սպասելով զինադադարի շուրջ համաձայնութեան գոյացման` Կազայի մէջ բախումները կը շարունակուին։
Պաղեստինեան եւ իսրայէլեան պատուիրակութիւնները երէկ Գահիրէի մէջ շարունակեցին զինադադարի
հաստատման շուրջ բանակցիլ: Եգիպտական աղբիւր մը երէկ գիշեր իսրայէլեան «Ետիոթ Ահրոնոթ»
օրաթերթի կայքին յայտնեց. «Այս գիշեր զինադադարի յայտարարութեան կը մօտենանք»: Մինչ
այդ, Կազայի դէմ իսրայէլեան յարձակումին ծիրին մէջ իսրայէլեան ռմբաձիգներ երէկ ռմբակոծեցին
Ռաֆահի ցամաքային անցքին շրջանը եւ մեծ վնասներ պատճառեցին: Իսրայէլեան ռմբաձիգները նաեւ
քանդեցին Զէյթուն թաղամասին մէջ գտնուող Ալի պըն Ապի Թալեպ մզկիթը: Պաղեստինեան դիմադրութիւնը
իր կարգին հակադարձեց իսրայէլեան յարձակումներուն` հրթիռակոծելով Իսրայէլի խորքը: Հրթիռակոծուեցան
Երուսաղէմը, Տեմոնան, Պեն Կորիոն օդակայանը եւ շարք մը բնակեցման վայրեր: